HATA PATUJOLO

4 Agu

Horas ma dihamu sude angka napinarsangapan, i ma raja dohot juara na torop, na manjaha Situs on. “Napuran tano – tano ma dohononku, rangging marsiranggongan , Huta pe padao – dao, ba sai tondi ma na masigomgoman.”
Ia dibagasan situs on, sinurathon do manang songon dia do adat di hita halak BATAK najolo di pangalaho ni anak na sorang, mangan haroan, mangupaupa dohot mamestahon anak na sorang i. Dung dipampe goarna (martutuaek mangihuthon adat najolo, jala tardidi mangihuthon adat nuaeng). Na pamuli boru dohot pabagas anak ( marunjuk), na mangompoi dohot na mamestahon jabu. Laos songoni muse dohot parbagi nie angka parjambaran, di tingki mangan haroan, mangupaupa na mamestahon anak i, dung dipampe goarna dohot na asing.

Jadi tarlumobi tu angka Amanta na ginoaran Raja/Pakar Adat, mangido maaf do iba di angka hahurangan i. Songon nanidok ni Natua – tua ma pasahaton tu hamu : Gala – gala sitelluk, teluk mardagul – dagul
Di angka hahurangan, nanget ma hamu mangapul – apul Ianggo apala maksud ni situs on, i ma asa lam tanak di iba sandiri taringot dohot asa nang mago be Adat Batak i. Manigor ma dapot botoon ni angka dongan na umposo, tar lumobi angka dongan na tinggal di pangarantoan songon dia do adat ni angka omputa na parjolo i laos botoonta ma huhut mangulahon, ai nang beha ingkon ganup do hita managam anak na sorang, mangan haroan, mamestahon anak i, pamuli boru dohot pabagas anak dohot na asing. Ai tung hailaon bolon do i, molo so binoto mangulahon adat niba di tingkina be.

Tutu, sai adong jumpang di bagason adat ni omputa i, angka aturan, na manogu tu haliluhon, jala na so siat tu pangantusion, alai tung mansai godang do nang disi angka na denggan siparateaetehononhon jala sitiruon. Dibahen i, pangidoan tu angka dongan na manjaha situs on. Dia adat na denggan jala na ringkot dope pankeon di tingki on, ima sigolomonta jala sipangkeonta, ndang pola sai tiruonta be i sudena, alain ringkot situtu do anggo botoonta. Dungkon ni i muse, molo binereng di kenyataan, mansai otik do na rela bersedia jala mampu patujoloon gabe Raja Hata di ulaon adat, mardomu ma i alani angka kesibukkan dohot perkembangan zaman. Sian 3000 – 5000 KK sada marga, holan tar 7-10 halak do na olo patujoloon gabe Raja Hata di paradaton. I pe godangan na matua nama i.

Marhite sian i asi ni roha dohot pangurupion ni Tuhanta sampang dope hupapungu, ima adat ni angka omputa na ni goaran ondeng. Ujungna dapot ma i husurati marhite sian na husungkuni angka raja – raja naung matau, jala huhut sitorop tampuk ni adat dohot uhum di tonga – tonga ni bangsonta dohot sian angka natua – tua na marbisuk. Asa ndada na hulingga i, ndada na hulonggo. Ndada na tubu sian rohangkon, na husungkuni do umbahen na huboto.

Tutu taringot tu parbagian ni angka jambar i dohot angka paraturanna, sai adong do asingna saotik niida di tingki nuaeng on, diganup luat, songon nidok umpama : “Asing dolok, asing do duhutna; asing laut, asing do uhumna”. Ia adong pe nuaeng saotik marsalisi, taringot tu parbagian ni angka jambar i, di angka luat na asing, ianggo sian na jolo sada hian do jala suman tu na tarsurat di bagasan situs on.

Molo tung hurang situs na met met on, alai molo boi dihayati jala dipraktekkon, ra nunga sada langkah maju i di na bersangkutan. Amggiat ma situs na met met on, boi membantu angka dongan na adong kemauan dohot bakatna na mardomu tu paradaton. Khususna parbagason ni anak mangoli – boru muli. Manang beha pe keberadaan ni situs na met met on, tong do pasahaton, mauliate tu Debata i.

Himbauan, asa lam di sempurnahon ma antong, baik susunan kalimat, bentuk dohot rupana. Mauliate godang ma hudok tu angka na pinarsangapan, i ma angka raja, dohot natua – tua na olo marhalojaon mangurupi ahu paturehon situs ADAT BATAK ON. Huhut mangalehon surat hatorangan taringot tu hasitonganna.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: